भूत...!

प्रवास इथला

काळाचा दूत

आजचा आज

उद्याचे भूत...!

शूल...!

एकेका शब्दातून

व्यक्त एकेक शूल

हळव्याला प्रचीती

भटक्याला रानभूल...!

मीमांसा...!

 

नपुंसकाचे शील

दुर्बलाची अहिंसा

बकाचे ध्यान अन

वांझोटी मीमांसा...!

आत्मभान...!

दुष्टचक्राच्या वावटळीत

उरावे कसे आत्मभान

'मस्त चाललय आमचं...'

तारण ठेवलाय स्वाभिमान...!

बेट...!

क्रुसाचा काटेरी वसा

वेदनेला भिडणे थेट

जादुई पोतडीत आज

सापडावे करुणेचे बेट...!

दुखवटा...!

कळपातला नव्हतोच कधी

ना चढविला कधी मुखवटा

त्यांच्या स्वयंभू क्षुद्रतेचा

मला का उसना दुखवटा...!

जंतू...!

बेनाम चिंता

अक्षय किंतु

मनी मानसी

षडरिपूंचे जंतू...!

संदर्भ...?

नि:संदर्भलाही

संदर्भ नवे...

कसे झुलावे

क्षणासवे...?

शून्य...!

तुझ्याशिवाय आयुष्य

एक पोकळ शून्य आहे

तुझ्याशिवाय माझ्यासाठी

प्रत्येकजण अन्य आहे...!

स्वगत...!

उदासीनतेची परिसीमा

अन एकलेपणाची हद्द

संवाद हरवला कधीचाच

आता तर स्वगतही रद्द...!

गुंथी...!

मनाचिये गुंथी

वेदनेचे ध्यान

आकळिता तत्व

व्यर्थ देहभान...!

मूल्य...!

कालबाह्य मूल्यांच्या अडगळीचा

कुणाला ठेवायचाय लेखा-जोखा

प्र-गतीच्या दिशाहीन झाकोळात

कुठली माउली अन कोण चोखा...!

मुमुक्षा...!

आदी तू मी आत्मज

संपूर्ण तू मी शून्यवत

क्षणिक माझी मुमुक्षा

तू चिरंतन तूच शाश्वत...!

काडेपेटी...!

काडेपेटी मागतो येता-जाता

विडी-बिडी  नाही, नाही नशा

पुष्कळ गोष्टी आहेत म्हणे

पेटवून टाकाव्यात अशा...!

द्वंद्व...!

आकाशी झेपावता पक्षी

डहाळी डहुळली जराशी

पाठवणी की आळवणी,

द्वंद्व कवटाळीत उराशी...!

विराणी...!

गर्द निळे निरभ्र आकाश

संथ खोल निश्चल पाणी

अश्राप जीवाचा एक हुंकार

उठता तरंग निळी विराणी...!

असणे...!

वृक्षवल्ली पशुपक्षी

स्वच्छंद वाहते झरे

'असण्या'चे भान नरा

येइतो आयुष्य सरे...!

बुद्ध...!?!

भावते वैराग्य आम्हा

मोहवितो शृंगारही

बुद्धाचे अनित्य तसा

मेनकेचा अंगारही...!

विचक्षण...!

संभ्रमित थोडासा

थोडासा विचक्षण...

रात्रभर नाही सरला

गोठलेला एक क्षण...!

फाके...!

विरलेले जगण्याचे वस्त्र अन

उसवलेले जाणीवेचे टाके

मूल्यांचा अभद्र बाजार,

संवेदनेला रोजचेच फाके...!

चला गया...!

मै जिंदगीका साथ

निभाता चला गया...

हर फिक्रको धुयेंमे

उडता चला गया...!

वेडाचार...!

कटीबद्ध जगरहाटी

सांभाळण्या 'सदाचार'

बदलाची अपेक्षादेखील

इथे शुद्ध वेडाचार...!

जीवात्मा...!

दृश्य-स्पर्श-गंध  अन

अलवार सुखाची धुंदी

मुक्त स्वच्छंद जीवात्मा

क्षणिक मोहाचा बंदी...!

'भाव'...!

सूर टिपेचा आवेश 'फोडो'

'साधने'ची छबी छानसी...

'देव' नावाचा कर्कश  टाहो

'भाव' भलताच मनी मानसी...! 

शिकस्त...!

अंतर्मनात संदिग्धता मात्र

प्रकट अविर्भाव नेमस्त...

जळीस्थळी काष्ठीपाषाणी

सुखाच्या शोधाची शिकस्त...!

न-व्यास...!

माणुसकीचा इतिहास रक्तरंजित झाला

जगाचा भूगोल बदलण्याच्या हव्यासात

वाल्मिकीला वाल्याच व्हावे लागेल

त्रीज्यांच्या युतीने बनलेल्या न-व्यासात...!

विश्वेश्वर...!

व्यथेलाही आवाज असतो

नक्कीच असतो नाद-स्वर

उमजण्याकरिता मात्र तो

ध्यानीमनी हवा विश्वेश्वर...!

निशां...?

शहीदौंकी चिताओंपर

लगेंगे हर बरस मेले

वतनपें मिटनेवालौंका

यहिं बाकी निशां  होगा...?

नांदी...!

भ्रष्ट-पुष्ट कोडगे ने-ते

उद्विग्न अराजकाची नांदी...

अविवेकी बेताल माध्यमे

कानकोंडे दुसरे 'गांधी'...!

भक्ती...!

भोळ्या भक्ताच्या भावाला

गरज नाही सक्तीची...

संधीसाधूंच्या सोंगाला

ओळख नाही भक्तीची...!

बेसूर...!

अधीर अन आतुर

लुब्ध अन चतुर

कशी जमावी मैफल

सूर-न-सूर बेसूर...!

अभोगी...!

हे असेच आहे काही

अभोगी आयुष्य माझे

नसण्याचे दु:ख रिकामे

असण्याचे सुंदर ओझे...!

कवयत्री...?

मर्त्य ...!

काही काळ तरी जगावे

नि:संदर्भ अन निर्हेतुक

अमूर्त या चिरंतनात

मर्त्य जीव आगंतुक...!

क्षण...!

आला क्षण गेला क्षण

जगला क्षण तगला क्षण

भूत-भविष्याने भंजाळलेली

वर्तमानाची वांझोटी वणवण...!

अहं...!

उर्मी अन बेभान मदहोशी

की गरज, उरक अन उपचार

'त्री'रीपुंच्या मायाजालात

स्खलन'शील' अहं लाचार...!

विशुद्ध...!

निरागस बाल्य-निर्हेतुक हास्य

उदंड विश्वास अन कोवळी स्वप्ने

आकांक्षेला मिळो विवेकी दृढता

जतन होवो निर्मल-विशुद्ध मने...!

खूळ...!

निखळ नि:स्पृहतेला

प्रसिद्धीचे खूळ 

उन्नतीच्या पोटी

दांभिकतेचा शूळ...!

उन्मनी...!

तुझ्या असण्यात तुझ्या नसण्यात

तुझ्या हसण्यात तुझ्या रुसण्यात...

धुंद मनपाखरू उडे रानीवनी

तुझ्या उन्मनी बरसण्यात...!

प्रश्न...!

आताशा बुडणा-या सूर्याला

'बराय उद्या भेटू...'

असे म्हणालो कि तो मला म्हणतो,

'कशावरून?

मधल्या रात्रीची तुला अजूनही इतकी खात्री आहे?'

सूर्य आता म्हातारा झालाय...!

- एकमेवाद्वितीय पुल अन्य कोण...?

चोच...!

भ्रमिष्ट वैराग्याला

आसक्तीची बोच

स्वयंभू पिंडाला

षडरिपुंची चोच...!

अविभक्त...!

नामाचा गजर

इंद्रायणीकाठी

संतांची मांदियाळी 

भावसंपृक्त...I

सुंदर ते ध्यान 

कटीवर हात 

उभा विटेवर 

अविभक्त...II

पहारा...!

अलवार सुखाची धुंदी

अन चित्तवृत्तींचा शहारा...

उत्तररात्री ग्लानीत मुग्ध

निजेवर भ्रमाचा पहारा...!

खेळ-खंडोबा...!

खेळात म्हणे चालायचेच,

'नवा गडी नवा राज'...

संदर्भ सोयीस्कर नवे

खेळ-खंडोबा सगळा आज...!

लक्षण...!?!

अनीतीने द्रव्य जोडी,

धर्म नीती न्याय सोडी,

संगतीचे मनुष्य तोडी,

तो येक मूर्ख

- समर्थ रामदास 

स्नेहमिलन...!

नेहमीच घडो स्नेहमिलन ज्यात

भेटीचे सुख तरी हरविल्याची खंत

उल्हास, रोमांच आणि भावनावेग

उत्कट या क्षणांसाठी पुन्हा मिळो उसंत...!

भवेत...!

दिवा वा यदि वा रात्रो

विघ्न्शान्तिर्भविष्यति I

नर नारी नृपाणान्च

भवेत दु:स्वप्ननाशनंम II

पाडवा...!

पहाटवारा उटण्याचा सुगंध

कोमल स्पर्श अन अभ्यंग

सुरेल स्वरांची साथसोबत

गौरव सहजीवनाचा अभंग...!

सचोटी...!

गजान्त वैभव

सोन्याचे पाऊल

सचोटीच्या दारी

लक्ष्मिची चाहूल...!

विश्वप्रार्थना...!

हर्ष-खेद, उन्माद-विवेक

विषाद आणि वंचना...

'तमसोमाज्योतीर्गमय'

एवढीच विश्वप्रार्थना...!

प्रदीप...!?!

दारी रांगोळी गगनी दिवा

रीत जुनी उन्मेष नवा

तमाने प्रदीप ल्यावा

सौहार्द्राचा मंत्र व्हावा...!